Ilyas Esbosınov-««Kamalak juldızları» balalar dóretiw­shilik festivalınıń «E» jónelisi boyınsha Nókis qalalıq bas­qıshınıń jeńimpazı,  9-klass oqıwshısı.

Ilyas kishkeneliginen baslap elimizge belgili músinshi Joldasbek Quttımuratovqa háwes etti. Qolına aǵash tússe onnan bir nárseler islewge, ılay menen plastalinnen músinler soǵıwǵa háreket etti. Biraq, hár qanday isti ustasınan úyrengen maqul degenindey, ol ózine ustaz izlep, paytaxtımızdaǵı 12-sanlı Ámet baqsı atındaǵı balalar muzıka hám kórkem óner mektebine qaray jol aldı. Kórkem óner mektebinde oǵan Ádilbek aǵa Shamuratov ustazlıq ete basladı. 6-klasında músin­shilik hám súwretshilikti úyrene baslaǵan Ilyastıń sheberligi kún sayın artıp bardı. Ol endi músinshilik hám súwretshilik janrların tereń túsinip, óziniń dáslepki miynetlerin dórete basladı.

-Men súwret salıwda kóbirek peyzaj hám natyurmort janrın júdá unataman. Al, músin­shilikte bolsa jáhánge belgili Mike­landjelonıń dóretken shıǵar­malarına qayıl qalaman. Fes­tivalda men xudojnik Qıdırbay Saypov hám de Berdaq baba­mızdıń músini hám sáwkele, balıq, búrkit relfleri menen qatnastım. Házir aǵashtan da músinler soǵıwǵa háreket etip atırman. Keleshekte Joldasbay Quttımuratovqa uqsaǵan músinshi bolmaq­shıman,-deydi Ilyas.

Kópshilik xudojnik hám músinshiler awır minezli insanlar boladı. Ilyas da awır minezli, sózin salmaqlap sóy­leytuǵın bala eken. Ol óz sózinde inglis tili, fizika hám sızıw pánlerine qızıǵatuǵınlıǵın aytıp ótti.

-Biziń klasımızda talantlı oqıwshılar júdá kóp. Álbette, klass basshımız Roza apa Ertaeva bizlerge durıs jol-joba beriwden sharshamaydı. Dostım Xursand ta men qatnasqan tańlawdıń jeńimpazı,-dep Ilyas bizlerge dostısın tanıstırdı.

Xursand Atamuratov -2014-jılı ótkerilgen ««Kama­lak jul­dızları» balalar dóretiw­shilik festivalınıń laureatı, «Istedod» tańlawınıń jeńim­pazı, «Juldızsha» tańlawınıń qat­nasıwshısı.

«Bolar bala bes jasınan belgili» degenindey Xursand ta kish­keneliginen baslap kórkem ónerge ıqlas qoydı. Ásirese, qosıq aytqandı júdá unatadı. Ol akademiyalıq vokal jónelisi boyınsha házir de kóplegen qosıqlar atqarıp, bir qansha tańlawlarda jeńimpaz bolıp kelmekte. Ámet baqsı atındaǵı 12-sanlı balalar muzıka hám kórkem óner mektebinde ustazı Rinat Dáwirxanovtan areyalardı atqarıwdı úyrenip atır.

-Men belgili operashımız Jeńisbek Piyazovqa qattı háwes etemen. Akademiyalıq vokal atqarıwshılıǵı-bul klassika. Onı qunt penen atqarsań ózińdi jeńil sezeseń. Sonlıqtan bolsa kerek bunday qosıqlardı atqarıw maǵan júdá unaydı. Házir italiyan, francuz tillerinde qosıqlar aytıwdı úyrenip atırman. Sheber atqarıwshı bolıwım ushın men ele de kóp tillerdi úyreniwim kerek,-deydi Xursand.

Xursand bos waqıtlarında fortepiano shertedi hám estrada jónelisleri boyınsha da qosıqlar atqarǵandı júdá unatadı. Sonday-aq, ol respublikamızda ótkerilgen bir qansha bayram keshelerine qatnasıp, kóp­shilikke tanımalı boldı. Biz de Xursand penen sáwbetimiz sońında oǵan hawazıń dúnyada jańlasın degen jıllı tileklerdi bildirdik.

Kamila Sháribaeva-««Kamalak» juldızları» balalar dóretiwshilik festivalınıń «B» jónelisi boyınsha qalalıq basqıshınıń jeńimpazı.

Kamila milliy saz ásbapların shertiwge júdá qızıǵadı. Ásirese, duwtar saz ásbabın shertiwge ıqlası bálent. Fetivalda da «Watan táriypi» atlı qosıqtı xor bolıp atqarıp, tóreshilerdi tań qaldırdı.

Kamila Esjan baqsı atındaǵı 1-sanlı balalar muzıka hám kórkem óner mektebinde ustazı Miyribek Erejepovtan duwtar shertiwdiń sırların úyrenip atır. Ol ele kóp nama úyrenbegen bolsa da, ustazınıń úyretgenlerin tez uǵıp aladı.

-Eń dáslep duwtar shertiw sırların ustazım Gulmira apa Kamalovadan úyrengenmen. Xalıq namaların atqarǵandı júdá unataman. Dástanlardı kóp oqıyman. Keleshekte Húrliman baqsıǵa uqsaǵan baqsı qız bolmaqshıman,-deydi Kamila biz benen sáwbette.

Bizler de 39-sanlı ulıwma bilim beriw mektebiniń talantlı oqıwshılarına tabıslar tiledik. Anıq maqsetlerdi búginnen aldına qoya bilgen oqıwshılardıń keleshegi aydın bolıwına isendik.

E.Xojamuratova

Q.Begimovtıń túsirgen súwretleri