Jaqında biz bayram qar­sańında onıń menen  sáw­betlestik. -Meniń tárbiyashı kásibine degen mehirim baqsha jasında-aq oyanǵan. Ele esimde, ózim islep atırǵan balalar baqshasına bar­ǵanımda ata-anama ınjıqlıq ete basladım. Sonda tár­biyashı Nurxan apa: -Sen erteklerdegi malikaǵa uqsaydı ekenseń. Malikalar tuwralı ertekti bileseń be?-dep ol maǵan kúle shıray menen baqtı. Onıń bul jıllı sózlerine qalay baylanıp qalǵanımdı bilmey, basımdı iyzep «awa» degenim boldı. Bárekella, qáne, jáne kimniń ertek esitkisi kelip tur?-dedi ol bárshe balalarǵa qarap. Hámme qolın kóterdi. -O-ho, meniń ertekshi balalarım júdá kóp eken ǵoy. Onda sizlerge esigimiz ashıq. Ertekler dúnyasına xosh kelipsiz!-dedi kúle shıray menen. Dalada turǵan ayırım jılap turǵan balalar siltidey tınıp, Nurxan apanıń izine ere basladı. Sol qatarı men de ishke kirdim…

Mektepke baraman de­genshe usı baqshada tár­biyalanıp, Nurxan apaǵa qattı bawır basıp qaldım. Sol payıtları-aq, meniń tárbiyashı kásibine bolǵan mehirim oyandı. Bul kásipti tańlawıma sebepshi bolǵan ustazlarım júdá kóp. Tax­takópir rayonın­daǵı 5-sanlı ulıwma bilim beriw mektebine birinshi klasta qolıma qálem uslatıp, háripti tanıtqan ustazım Ziyada apa Jaqsımuratova hám basqa muǵallimlerimnen júdá min­netdarman. Tax­takópir rayo­nındaǵı peda­gogika kásip óner kol­ledjindegi ustazım Gúlchexra Seytna­zarovanıń sabaq ótiw usılı júdá unaytuǵın edi. Kolledjdi pit­kergenimnen soń, ózim tár­biyalanǵan rayonı­mızdaǵı 3-sanlı mek­tepke shekemgi bilimlendiriw má­kemesinde miynet jolımdı basladım.

Ózim arzıw etken balalar baqshasına qayta oraldım. Sol balalıǵımdaǵı waqıyalar esime  tústi. Balalarǵa tárbiyashı bolıp, bazıda qıynalıp qalaman. Usınday payıtları tárbiyashı Nurxan apamdı yad­qa alaman. Onıń usıllarınan payda­la­naman. Jumıs barı­sında baqsha meń­geriwshimiz Miywa­gúl apa Áb­dieva maǵan óziniń bahalı másláhátlerin berip, hárdayım qol­lap-quwatlap turadı.

«Jıldıń eń jaqsı tárbiyashısı-2017» tańlawınıń Ózbekistan respublikalıq basqıshına jetip kelgenimde, kewlimdi qorqınısh iyeledi. Arzıwlarımnıń biri bolǵan joqarı oqıw ornına kiriw edi. Bul tańlawda jeńimpaz bolsam, arzıw giltine iye bolaman. Bar dıqqat-itibarımdı bir jerge jámlep, tek alǵa súrenin nıshan ettim. Tańlawda barlıq nátiyjelerde joqarı ball toplap, tóreshiler ekinshi orınǵa ılayıq dep taptı. Eń quwanarlısı, mámleketlik grant tiykarında óz jónelisim boyınsha joqarı oqıw ornında test sınaqlarısız kiriw baxtına hám Ózbekistan Xalıq bilim­lendiriw ministrligi tárepinen «Xalıq bilimlendiriw aǵlası» kókirek nıshanına iye boldım. Bul tabıs­larımnıń bárshesi us­tazlarımnıń bergen bilimleriniń nátiyjesi. Baq­shadan baslanǵan soqpaq usı dárejege alıp keldi,-deydi qahar­manımız erisken tabısları haq­qında.

«Balalar arasında bolǵanımda ózimdi dúnyadaǵı eń baxıtlı adam­man dep esaplayman» degen edi hindistanlı danısh­panlardıń biri. Genjegúl Tóre­muratova da áne sonday ba­lalardıń arasında júrip, olarǵa tárbiya bergendi unatadı. Olardıń jaqsı tárbiya alıwları ushın hár tárepleme izlenedi. Ol mám­leketimiz tárepinen berilgen im­kaniyatlardan quwanıshta. Házirgi waqıtta Genjegúl Ájiniyaz atındaǵı Nókis Mámleketlik pedagogikalıq institutinıń 1-kursında oqıp atır. Ke­leshekte instituttı tamamlap, kásiplik sheberligin arttırıp, jas áwladlardıń ónip-ósiwi ushın ayanbay xızmet etiw niyetinde. Aldaǵı waqıtları Genjegúl Tóre­muratova­nıń oqıwlarında tabıslar tilep, balalardıń zeyinli, qábiletli bolıp jetilisiwine óz úlesin qosadı degen úmittemiz.

J.ALPÍSBAEVA

arnawlı xabarshımız