Nókis rayonındaǵı 1-sanlı qánigelestirilgen mámleketlik ulıwma bilim beriw mektebiniń «Aqmańǵıt» komandası bir neshe jıllardan berli «Kewilli startlar» sport jarıslarına belsene qatnasıp kiyatır. Mekteptegi tájiriybeli dene-tárbiya muǵallimleri oqıwshılardı shaqqanlıqqa, ziyreklikke tárbiyalap, bunıń nátiyjesinde mektep komandası sońǵı on jılda «Kewilli startlar» sport jarıslarında eki márte Ózbekistan chempionı, eki márte Ózbekistan kóleminde 2-orın hám úsh márte 3-orınlardı iyelep, bilimlendiriw dárgayın pútkil Ózbekistanǵa tanıttı.

Elimiz ǵárezsizliginiń 26 jıllıq toyı qarsańında «Aqmańǵıt» komandası ózleriniń úshinshi kubogın qolǵa kirgizip, res­publikamızdıń bilim­lendiriw tarawı wá­killerin, mektep já­máátin hám ata-anaların sheksiz quwanıshqa bóledi. Ótken háptede mek­teptegi tájiriybeli us­tazları M.Qıdır­niyazov hám B.Pal­wanov bas­shılıǵındaǵı koman­danıń 24 oqıw­shısı Nókis temir-jol vok­zalında saltanatlı túrde kútip alındı. Olarǵa ministrlik hám mektep jámááti táre­pinen tayarlanǵan sawǵalar tapsırıldı.

-Mektebimizde koman­damızdıń 2008-2013-jıllarda qolǵa kirgizgen eki kubogı bar. Bıyıl olar jáne Ózbekistan chempionları bolıp, kuboglar sanın úshke jetkerdi,-dep sóz basladı mektep direktorı S.Qos­nazarov quwa­nıshlı túrde. 14-21-avgust aralıǵında Tashkent wálayatınıń Bostanlıq rayonında  bolıp ótken «Kewilli startlar» sport jarısınıń sońǵı basqıshına 4-9-klass oqıwshılarınan ibarat 24 ul-qızlarımız jónep ketken edi. Olar on kún dawamında dem alıw orayında dem alıp, jarısqa kúshli tayarlandı. Eń quwanıshlısı, komandamız pútkil Qaraqal­paqstan atınan barıp, abıraydı qoldan bermey, jáne Ózbe­kistan chempionları degen atqa miyasar boldı.

Bul jetiskenlik bárinen de burın oqıwshılardıń ata-anaların maqtanısh sezimlerine bóledi. Ul-qızları medalları kóki­reklerinde jarqırap, qollarında kubok penen poezddan túsken payıtta ata-analardıń júz­lerindegi quwanıshtı kórip, bizlerdiń de tóbemiz kókke jetti. Olardıń arasında «Aq­mańǵıt» komandası quramında birden úsh aqlıǵı chempion bolıp qaytqan Qonısbay ata Turım­betov ta bar.

-Meniń aqlıqlarım Sulayman, Arıwxan hám Akbar júdá shaq­qan, sportqa ıqlas qoyǵan, bilimli oqıwshılar. Olar «Kewilli startlar» jarısına kóp jıllardan berli qatnasıp kelmekte. Bıyıl usı jarısta jeńimpaz boldı. Men bunnan júdá quwanıshlıman. Aqlıqlarımnan keleshekte úmitim mol,-deydi ol.

«Aqmańǵıt» komandası jarıstıń sońǵı basqıshında Tashkent, Surxandárya, Buxara, Ferǵana, Namangan wálayatlarınıń ko­mandaları menen óz-ara bel­lesti. Jarıs dawamında koman­danıń barlıq aǵzaları bir jeńnen qol, bir jaǵadan bas shıǵarıp, jeńimpaz bolıw ushın háreket etti.  Juwmaqta qarsılaslarınan kóp upay toplaǵan qara­qalpaqstanlı balalar yarım finalda Buxara hám finalda Ferǵana koman­dalarına qarsı maydanǵa túsip, olardı da jeńip shıqtı. Usı oqıwshılar qatarında jeńimpaz bolǵan 8-klass oqıwshısı Aysulıw Qazaq­baeva jarıs haqqındaǵı tásirlerin tómendegishe bildirdi.

-Men «Kewilli startlar»ǵa 3 jıldan berli komandamız qura­mında qatnasıp kelemen. Bıyılǵı jarıs júdá qızıq hám tásirli boldi. Komandamızdaǵı barlıq oqıwshı bar kúshi menen háreket etti. Bizlerge yarım finalda Buxara hám finalda Ferǵana ko­mandaları kúshli qar­sılıq kórsetti. Biraq, bizler olardan shaq­qan háreket ettik hám jeńimpaz boldıq. So­nıń menen birge, dem alıw orayında kewilli dem alıp, kóplegen doslar arttırdıq.

Qolǵa kirgizlilgen ájayıp tabıstan bala­lardıń kewilleri kó­terińki. Olardıń ullı bayram qarsańında «Kewilli startlar» sport jarısınıń 1-orın iyeleri bolıp, elimizge qaytıwı bayram quwa­nıshlarınıń bas­laması boldı. Solay eken, biz de «Aqmań­ǵıt»tıń ziyrek, shaqqan, quwnaq, sportshı oqıwshıların jeńisi menen qutlıqlap, olarǵa taza oqıw jılında mol tabıslar tileymiz.

B.Sultamuratov

arnawlı xabarshımız