Jáhángir bes jasar úkesi Shaxnoza menen bárqulla birge oynaytuǵın edi. Túste apası olardı uyqılatpaqshı bolıp bólmesine kirgizip, ózi de dem alıwǵa bólmesine ketti. Pursattan paydalanǵan Jáhángir menen Shaxnoza ayaǵınıń ushında áste júrip, tısırlatpay sırtqa shıǵıp ketti. Al, apası bolsa olardı uyqılap atır dep oyladı. Olar ekewi shańqay túste kóshede oynay basladı. Basqa balalar bol­maǵanlıqtan zerigip ketti.

-Júr, basqa jaqlardan aylanıp qaytayıq,-dedi úkesine Jáhángir. Kósheniń arǵı tárepinde  úlken bir shuqırda suw tolıp tur eken. Olar suwdı kórdi de qasına barıp otırdı. Qurı otırmay jarıspaqqa suwǵa tas ılaq­tırıwǵa kiristi. Sol waqıtta Shaxnoza aldıǵa qaray eń­terilip ketti. Ájaǵası bolsa onı julqılap-julqılap, tartıp kórip edi kúshi jetpey úyine qarap apa-a-lap juwırıp ketti. Shaxnoza bir-eki márte suw jutıp mantıǵa basladı. Suw oǵan boy bermeytuǵın edi. Ele de bir tamırdı zorǵa uslap turdı. Sol payıtta bir aǵay joldan ótip baratırıp, járdem sorap baqırıp atırǵan qızdıń dawısın esitip, onı bir ámellep qut­qarıp aldı. Suwdan shıqqan Shax­noza qal­tırawı menen ızası kelip jılap jiberdi.

-Qay jerde turasań?-dep soradı aǵay oǵan álpayım túrde. Shax­noza qolları qaltırap úyi tárepke qol siltedi. Aǵay bolsa qızdı kóterip úyine apardı. Bunı kórgen apası quwan­ǵanınan:

-Eger, siz bolmaǵanıńızda bilmedim ne qılar edik. Bul isińiz benen bizge úlken járdem berdińiz, sizge kóp-kóp raxmet,-dep ol aǵayǵa mol-molaqay sarpay berip jiberdi. Al, aǵay bolsa, óziniń sawap islegenine quwanıshlı edi. Shaxnoza tez dúzelip ketti. Ol endi hesh qashan sol shuqırdıń átirapına bar­maytuǵın boldı.

Munira SEYTBEKOVA

Paytaxtımızdaǵı «Progress» bilimlendiriw hám rawaj­landırıw orayınıń oqıwshısı