Awıldaǵı ájaǵamnıń qoy-eshkileri oǵadá kóp. Azanda janlıq­lardıń ılaq-qozı­ların alıp qalıp, qal­ǵanların padaǵa qosıp jiberedi. Ájaǵamnıń bes jasar Gúljamal atlı qızı bar. Ol ılaq hám qozılardı júdá jaqsı kóredi. Olardı úy áti­rapındaǵı otlaq jerde baǵadı.

Bir kúni onıń menen birge qo­zı-ılaqlardı ba­ǵıstım. Gúl­jamal kishkene ǵana ılaqlardıń biri-biri menen dú­gisip atır­ǵanların kórip qızıq­sındı. Ol da ılaq­lardıń qasına barıp dúgisti. Gúljamal ılaq­lar menen dúgiskenine más bolıp kúldi. Ási­rese, olardıń ishinde aq ılaqtı táwir kóretuǵın edi. Bir waqıtta aq ılaq penen dúgisip edi, ol birden mańlayın uslap jılap jiberdi. Keyin bilsem, aq ılaqtıń shaqları shıǵıp atırgan eken. Ílaqtıń shaqları Gúl­jamaldıń mańlayına qattı tiygenlikten jıla­ǵan eken. Sonda Gúl­jamal jılamsırap:

-Aq ılaǵıma shaq shıqsa ol úlkeyipti. Endi onı aǵam padaǵa qosıp jiberedi. Men onıń ketkenin qále­meymen. Basqa ılaqlar aq ılaǵımday bolıp oynamaydı,-dep qamsıqtı.

Úyge kelip Gúljamal aǵasına bolǵan waqı­yanı aytıp berdi.

-Qızımay, ılaq bir turısta óspey tura bermeydi-ǵoy. Sen de úlkeyip oqıwǵa barasań. Нlaǵıń da úlkeyip endi padaǵa baradı. Biraq, olar seniń ǵam­qor­lıǵıńdı  hesh waqıtta umıtpaydı,-dep jubatqan boldı. Al, Gúljamal bolsa aǵasınıń gáplerine kewli kóte­rildi.

Xafiza Sultaniyazova

Paytaxtımızdaǵı 40-sanlı ulıwma bilim beriw mektebiniń oqıwshısı