Áziz klubımızdıń ıqlasbentleri! «Ekoháreket»tiń búgingi sanın tolıq túrde oqıwshılarımızdıń xatlarına arnadıq. Olardı oqıw arqalı sizlerdiń de ana tábiyatqa bolǵan mehirińiz artıp, ózlerińizdi tolǵandırıp júrgen ekologiyalıq mashqalalar haqqında bizge jazıp jiberesiz degen úmittemiz. Eger, sizlerde ana jerimizdiń ekologiyalıq jaǵdayın jaqsılaw boyınsha tıń pikirler hám ideyalar bar bolsa, ekilenbesten bizge xat jollań. Biz olardı klubımız arqalı járiyalaymız.

REDAKCIYA

Búgingi kúni adamlardıń tábiyatqa múnásibeti ádewir dárejede tómenlep baratır­ǵanday. Bunı átirapımızda toplanıp qalǵan shıǵındılardan kóriwimizge boladı. Biz ana tábiyatımızǵa bolǵan qat­nasımızdı unamlı tárepke ózgertiwimiz ushın ekologiyalıq mádeniyatımızdı qáliples­tiriwimiz, ekologiyalıq bilim­lerimizdi bayıtıp barıwımız tiyis. Bunıń ushın eń dáslep biz jasap atırǵan Jer planetası tek bizlerge emes, keleshek áw­ladlarǵa da tiyisli ekenligin uǵınıwımız kerek. Usı maqsette hár kim jeke túrde ekologiyalıq bilimlerin bayıtıp barıwı hám kúndelikli turmısta olarǵa ámel etiwi talap etiledi. Máselen, ápiwayı ǵana kóshe hám basqa da jámiyetlik orınlarǵa se­mechka qabıqların taslamaw ol adamnıń ekologiyalıq má­deniyatı qálipleskenliginen derek beredi.

„alabalıq túrde ekologiyalıq mádeniyatqa erisiw ushın balalar hám jas óspirimler arasında úgit-násiyat isleri úlken nátiyje beredi. Sebebi, olar erteńgi kúnniń iyeleri. Sonlıqtan, bilimlendiriw dár­gaylarında «Ekologiyalıq má­deniyat bul ne?», «Qorshaǵan ortalıq tazalıǵı», «Jaslar eko­turmıstı tańlaydı», «Ana tá­biyatımızdı asırap-abaylayıq!» temalarında seminar-tre­ningler, interaktiv oyınlar, ámeliy isler, tańlawlar ótkerip, olar arqalı mektep oqıwshılarına ekologiyalıq mashqalalar hám olardı sheshiw tuwralı maǵ­lıwmatlar berip barsaq, eko­logiyalıq mádeniyattıń ǵalabalıq túske eniwine úles qosqan bolamız.

Turdıbek NawrÍzbaev

NMPI janındaǵı Shımbay akademiyalıq liceyiniń oqıwshısı