Bir kúni Zamira apa  balası Azamatqa sıyır sawısıwǵa kómeklesip jiber, dedi. Azamat bolsa uwh, sharshap turman,-dep zorǵa sırtqa shıqtı. Sebebi, ol televizordan eń súyikli multfilmin kórip atır edi-dá. Sonlıqtan oǵan bul is onsha jaqpadı. Apası sıyırdı sawıp bolıp:

-Azamat, baspaqtı jaq­sılap bayla, shala qaldırma.  Qoranıń qapısın da jaqsılap jawıp ket!-dedi shelektegi sútti alıp úyine ketip baratırıp.

Azamat buzawdı súyrep qoraǵa alıp bardı. Soń jibin bir bayladı da qoranıń qapısın jabıwdı umıtıp, multfilm kóriwge asıǵıp, úyine juwırıp kettı. Úyine kirdi de dárhal televizordıń aldına otırıp aldı.

-Baspaqtı bayladıń ba, balam?-dedi apası jáne. Azamattıń eki kózi televizorda, anasınıń sózine itibar da bermedi.

Erteńine azanda apası sıyır sawıwǵa shıqsa, qoranıń qapısı ańqayıp ashılıp tur. Ol qoraǵa kelse, baspaq joq. Shıǵıp ketken shıǵar,-dep arjaq-berjaqlardı izlep kórdi. Qońsısınıń qorasın da kórip qayttı. Biraq, buzaw hesh jerde joq. Ashıw atına mingen Zamira apa Azamatqa baqıra basladı:

-Saǵan keshe baspaqtı jaqsılap bayla,-dep edim ǵo. Eń bolmaǵanda qoranıń qapısın jaqsılap japsań boladı-ǵo!-dedi. Azamat bolsa qılǵan isinen pushayman bolıp, kún boyı apasınıń aytqan barlıq jumısların mıńq etpey islep júrdi.

Azamat, bar sabanxanadan baspaqlarǵa ot salıp jiber,-dedi apası ele baspaqtıń tabılmaǵanına ashıwlı túrde. Ol sabanxananıń esigin ashtı da, otlardı bir shetke jıy­nap, alıp ketiwge tayarladı. Qarasa, sabanxananıń múyeshinde joytılǵan bas­paq, jay-paraxat otlap júr. Bunı kórgen Azamat;

-Apa, apa! Baspaq tabıldı,-dedi dawısınıń barınsha…

-Qáne, qáyerde?-dedi anası epeleklep. «Baspaqtıń juwırǵanı sabanxanaǵa shekem»,-degeni ıras eken-ǵoy,-dedi Zamira apa kúle shıray menen.

-Apa, men endi aytqanlarıńızdı hesh qashan shala qılmayman,-dedi Azamat  kózine jas alıp.

-Áy, aynanayın balam ay, bul saǵan sabaq boladı. Endigide islegen isińdi shala etpeyseń,-dep balasın bawırına bastı.

Gúldana EREJEPOVA

Nókis rayonındaǵı 20-sanlı ulıwma bilim beriw mektebiniń 8-klass oqıwshısı