Balalıǵında «Jetkinshek» gazetasına 4-5 qatar xat jollap, bara-bara gazetanıń belsendi jas xabarshısına aylanǵan, sol arqalı keleshektegi dóretiwshilik hám kásiplik jolına dáslepki qádemin taslap, házirgi kúni respublikamızǵa belgili jurnalist yamasa jazıwshı-shayır atanǵan insanlar kópshilikti quraydı. Gazetamızdıń ótken bayram sanında olardıń kóbisin atpa-at atap ótken bolsaq ta, ele sóz etpegenlerimiz barshılıq. Biz ushın eń quwanarlısı, bul insanlardıń derlik barlıǵı «Jetkinshek»ti ózlerine ustaz, dóretiwshilik dúnyasına kirip keliwindegi tuńǵısh mektebi dep esaplaydı.

Belgili jurnalist, «Ustaz jolı» gazetasınıń juwaplı xatkeri Qaljanbay aǵa Qutlımuratov ta «Jetkinshek»ti balalıqtaǵı sırlas dostı, jurnalistika tarawına kirip keliwindegi dáslepki soqpaq-tájiriybe mektebi dep biledi. Ol bul gazetanı paytaxtımızdaǵı házirgi 10-sanlı mek­teptiń baslawısh kla­sında oqıp júrgen waq­tında-aq súyip oqıy­tuǵın edi. Dáslepki muǵallimi Ayman Mır­zekova gazetanıń hár sanında shıqqan maqala, gúrriń hám qosıqlardı sabaq waqtında oqıp berip, onıń dóretiwshilik qábi­letine qanat qomlattı. Keyin ala ol «Jetkinshek»ke óziniń mek­tebinde bolıp atırǵan jańa­lıqlardı operativ túrde jazıp, basılımnıń belsendi xabar­shısına, sol dáwirdegi redakciya xızmet­kerleriniń úmitli oqıw­shılarınıń birine aylandı. Ondaǵı dóre­tiwshilik qábiletti, jıldan-jılǵa ushı ótkirlesip kiyatırǵan qá­lemdi sezip-kórip júrgen gaze­tanıń bas redaktorı marhum Ábdimurat Atajanov bir kúni redakciyaǵa maqalaların alıp kelgeninde kabinetine shaqırıp, ádewir waqıt sáwbetlesti hám oǵan gazetada korrektor bolıp islewdi usınıs etti.

Solay etip, 1977-jıldıń 23-avgustında Qaljanbay aǵa Qutlı­muratov «Jetkinshek» gazetasında korrektor bolıp jumıs basladı. Jas qánigeni redakciyanıń barlıq dóretiwshilik jámááti jaqsı qarsı aldı. Bilmegenlerin úyretip, gaze­tanıń shıǵıw procesi menen jaqın­nan tanıstırdı. -Ol waqıtları házir­gidey kompyuterler joq. Jumıs procesi ádewir quramalı edi,-deydi «Jetkinshek»tegi dáslepki jumıs kúnlerin eske alıp. -Mektep turmısı, ádebiyat, ilim-texnika hám sport, xatlar bólimleriniń hár biri gazetanıń hár sanına eń kem degende 100-150 qatar material beriwi kerek. Men bolsam gaze­tadaǵı qátelerdi kózden ótke­remen. Házirgidey kompyuter ekranında oqıw qayda? Bólimlerde lenotiv mashinkada terilgen materiallardıń qátelerin grankaǵa salaman. Sóytip ol qaytadan tas baspada basıladı.

Juwaplı xatkerimiz Aytbay aǵa Qoyshıqulov júdá qatal minezli, talapshań, berilgen tapsırmanı óz waqtında orınlanıwın qatań talap etetuǵın adam edi. Bunnan basqa, xatlar bóliminiń baslıǵı Doshımbay Dospanov, mashinistka Tursın apa Xojamuratova, jurnalistlerden Amangeldi Xalmu­ratov, Keńesbay Kárimov, Saylaw­bay Jumaǵulov, Shınargúl Paxrat­diynova, Saǵındıq Embergenov, Jumabay Jaqsımu­ratov, Erejep Esemuratov, Beknazar Ernazarov, Bazarbay Seytaev, Ayapbergen Seytekovlar menen birge isledim, olardan bilmegen­lerimdi úyrendim. Jurnalist sıpa­tında jetilisip, usı gazetada tisim shıqtı.

Qaljanbay aǵanıń jumısına principli túrde jantasıwı, dóre­tiwshilik jámáát penen jaqsı qarım-qatnas jasawı, óz ústinde tınımsız islewi kóp ótpey gazeta basshılıǵı tárepinen xoshametlendi. Onı 1982-jılı korrektorlıqtan gazetanıń arnawlı xabarshısı, keyin ala 1989-jılı mektepler bólimine ádebiy xızmetker hám 1992-jıldan baslap ilim-texnika hám sport bólimi baslıǵı lawazımlarına ótkerdi.

Qaljanbay aǵa bul juwap­ker­shilikli wazıypalardıń barlıǵın minsiz atqardı. Sonıń menen birge, tez-tezden alıs rayonlarǵa xızmet saparlarına shıǵıp, ol jerdegi balalar turmısı menen jaqınnan tanıstı. Gazeta arqalı olardıń mashqalaların kóterip shıqtı.

Usınday dóretiwshilik sapar­lardıń birinde ol Tórtkúldegi balalar jazǵı dem alıw orayına sapar etedi. Ol jerge jetip bar­ǵanında dem alıw orayınıń barlıq xızmetkerleri ayaqqa turǵanınıń, balalardıń birewi lagerden qashıp ketip, sonı izlep atır­ǵanınıń ústine baradı. Sol kúni hám erteńine kúni boyı oray xızmet­kerlerine qosılıp Qal­janbay aǵa da sol qashqın balanı izleydi. Ekinshi kúni keshke jaqın qashqan balanıń ózi dem alıw orayına qaytıp keledi. Qaljanbay aǵa bul waqıyadan tásirlenip «Qashqın» atlı maqala jazadı. Bul maqala «Jetkinshek»tiń kóp sanlı oqıwshılarınıń arasında úlken diskussiya boladı. Bunnan ruwxlanǵan Qaljanbay aǵa Tábiyattı qorǵaw jámiyeti menen birge Nókis qalasında balalar ushın haywanatlar baǵın qurıw mashqalasın gazeta arqalı kóterip shıǵadı. Ótken ásirdiń 90-jıllarınan aldın «Nókiste haywanatlar baǵı bola ma?» degen temada gazetada jarıq kórgen onıń bul maqalası bú­gingi kúni de óziniń aktuallıǵın joytpaǵanın kóriwimizge boladı.

Balalar gazetasında islegen 19 jıl dawamında Qaljanbay aǵa dóretiwshilik hám jeke ómirinde kóplegen tabıslarǵa eristi, quwa­nıshlı waqıyalardıń gúwası boldı. 1983-jılı Qumırxan apa Sultanova menen shańaraq tiklep, Atabek hám Gúlzar ismli ul-qızlardı tárbiyaladı. «Jetkinshek» gazeta­sında toplaǵan bay táji­riybesi, maqala jazıwdaǵı sheber­ligi jámiyetshiliktiń kózine túsip, 1996-1999-jıllar aralıǵında «Nókis haqıyqatı» gazetasına juwaplı xatkeri bolǵan bolsa, 1999-jıldan búginge shekem «Ustaz jolı» gaze­tasınıń juwaplı xatkeri lawazım­ında islep atır. Bul aralıqta Qaljanbay aǵanıń perzentleri erjetip, ákesiniń ármanın iske asırıp, joqarǵı oqıw orınlarına oqıwǵa tústi. Házirgi waqıtta olardan aqlıq súyip, Qumırxan apa menen birgelikte baspasóz tarawında jemisli miynet etip atır.

Begis Sultamuratov

arnawlı xabarshımız