Jaqında ǵana redakciyamızǵa Surxandárya wálayatınıń Termiz qalasındaǵı 3-sanlı ulıwma bilim beriw mektebiniń 6-klass oqıwshısı Gulferuz Sidabillaevadan xat keldi. Ol gazetamızda usı jılı járiyalanǵan «Kitabım-quyashım» atlı tańlawǵa ózi jazǵan maqalasın jollaptı. Surxandáryalı dostıńız xatında «Jetkinshek» gazetası menen dos bolıp, turaqlı ıqlasbenti bolıwın aytıp ótken. Biz de «Jet­kinshek»tiń dostı kóbeygeninen quwanıshqa bólendik. Bizler Gulferuzdıń maqalası menen tanısıp, onı gazetada járiyalawdı maqul kórdik hám aldaǵı waqıtları onnan bunnan da mazmunlı xatların kútemiz.

REDAKCIYA

Kitaptı men quyashqa megzetemen. Ol jolımızdı jaqtılandırıp qoymastan, kewillerge jıllılıq baǵısh­laydı, aqılımızǵa aqıl qosadı. Hár bir kitaptıń óz ornı bar, sol kitaplar ishinde men kóbirek ádebiy kitaplardı oqıwǵa háreket etemen.  Qaraqalpaq eliniń qos bayteregi Ibrayım Yusupov hám Tólepbergen Qayıpbergenovlardıń kitapların súyip oqıyman. Al, jaqında bolsa men Pirimqul Qadirovtıń «Nizomning tantiligi»  hám Qudayberdi Toqtabaevtıń  «Sariq devni minib» romanların oqıdım.

Qudayberdi Toqtabaevtıń shıǵarmaların kópshilik balalar súyip oqıydı. Men oqıǵan kitapta Hoshim obrazı sheber sáwlelengen.  Fan­tas­tikalıq waqıyalar, Hoshim­nıń islegen qıńır­lıqları naǵız balalardıń ómirinen alın­ǵan. Shınında da, balalar qıyalparaz boladı hám hesh nárseniń aqıbetin oylamastan ózi oylaǵan oyın tezirek ámelge asırıwǵa háreket etedi. «Sariq devni minib» shıǵarmasında da jazıwshı usı nárseni bayan­laǵan hám balalardı kitap penen dos bolıwǵa, óner úyreniwge baǵdarlay alǵan.

Al, Pirimqul Qodirovtıń «Nizomning tantiligi» shı­ǵarmasın oqıp, júdá tásir­lendim. Sebebi, jazıwshı kitap qaharmanı Humoyun hám Nizomdı sonday sheber qaharmanlar etip jaratıwı hám kewlindegi pikirlerdi tolıq hám anıq bayan etiwi meni tolqın­landırdı. Jazıw­shı kitap arqalı oqıwshını tariyx hám ádebiyatqa qızıǵıwshılıǵın jáne de arttıradı. Humoyun dáw­júrek, márt, aqıllı hám saqıy insan. Humo­yunnıń obrazı arqalı oqıwshı usı pazıy­letlerdi úyrene aladı.Nizom hám Humo­yunnıń doslıǵı, olardıń taǵdirleri hár bir oqıwshını tereń oyǵa saladı.

Qullası, men qolıma qanday kitap alsam da hár bir kitaptıń ózine tánligi, hesh qaysısı bir-birine uqsamaytuǵının ań­ladım. Usınday ájayıp kitaplardı dóretken avtor­lardan minnetdar bolaman. Kitap bolmasa, biziń jolı­mızǵa jaqtı nur taratıwı qıyın boladı. Sonlıqtan da, kitaptı quyashqa meg­zetemen. Keliń, doslar bar­lıǵımız kitap penen dos bolıp, ruwxıy azıǵımızdı bayıtayıq!

Gulferuz Sidabillaeva

Surxandárya wálayatı Termiz qalasındaǵı 3-sanlı ulıwma bilim beriw mek­tebiniń 6-klass oqıwshısı