Jazǵı dem alıstı kewilli ótkerip atırǵan qádirdan oqıwshılar! Bul jazǵı dem alıstı tek ǵana sizler emes, bálkim ata-analarıńız, ustazlarıńız da asıǵıslıq penen kútken bolsa kerek. Sebebi, oqıw jılı dawamında sizlerge tálim-tárbiya bergen, sorawlarıńızǵa erinbesten juwap qaytarǵan, barlıq erkeliklerińizdi sabırlılıq penen kótergen muǵallimlerińiz de jaz paslında dem alıp, kelesi oqıw jılında isti jańa kúsh, ǵayrat penen baslawdı niyet etedi. Ata-analarıńız da dem alıstı mazmunlı ótkeriwińiz ushın sizlerge keń imkaniyatlar jaratıp beredi. Al, súyikli gazetańız «Jetkinshek» bolsa, sizlerdiń dem alıs kúnlerińizdiń qay jerde qanday sharayatta ótkeriwińizge qaramastan, onı biyhuwda ótkerip jibermewińizdı qáleydi. Yaǵnıy, sizler dem alısta «Jetkinshek»tiń hár bir sanın qaldırmastan oqıp, óz dóretpelerińiz benen sonday-aq, ondaǵı keshelerge turaqlı túrde qatnasıp barsańız, bul gazeta menen dos bolıp, tuwrı jol tutqanıńızdı túsinesiz. Sebebi, súyikli gazetańız sizlerdiń ruwxıy dúnyańızdı bayıtıw, bilim dárejeńizdi asırıw menen birge, redakciya menen tıǵız baylanısta bolıwıńız ushın,  iygilikli isti jolǵa qoyǵan.

25-may kúni 2017-jıl-Xalıq penen pikirlesiw hám insan mápleri jılında 1-iyun -Xalıqaralıq balalardı qorǵaw kúni hám «Jetkinshek» gazetasınıń 85 jıllıǵına baǵıshlanǵan redakciya janınan shólkem­lestirilgen «Dilwar» jas xabarshılar dógereginiń náwbettegi seminar-treningi ótkerildi. Seminardı gazetanıń bas redaktorı A.Em­bergenov ashtı hám bul ilajdıń maqseti hám wazıypaları haqqında oqıwshılarǵa túsindirip ótti. Sonday-aq, ol gazetanıń balalar turmısında tutqan ornı, jas qálemkeshlerimizdiń gaze­tamızǵa bolǵan ıqlası, umtılısı, jańalıqqa janı qumarlıǵı joqarı dárejede ekenligin maqtanısh penen tilge aldı. Mektep partasınan baslap ruwxıy dúnyasın bayıtıp barıwǵa, bilimli bolıwǵa talpınǵan  balalardan erteńgi kúni xal­qımızdıń maqtanıshı bolatu­ǵınday ul-qızlar jetilisip shıǵa­tuǵınlıǵın ayrıqsha atap ótti. Gazetanıń juwaplı xatkeri D.Úbbiniyazova óz sózinde «Jetkinshek» gazetası oqıwshı­lardıń bos waqıtların biyhuwda ótkermey, xabarshılardı óz átirapına jámlep, usınday tárbiyalıq áh­miyeti  joqarı ushırasıw kesheleri, seminar-treninglerdi shólkemlestirip, oqıwshılarda úlken qızıǵıw­shılıq payda etip atırǵanın, sonday-aq, jas qálemkeshlerdıń sanı, olardıń qáleminen dó­regen shıǵar­maları  jıldan-jılǵa kóbeyip atırǵanlıǵın mısallar menen keltirip ótti. Al, belgili balalar shayırı Ya.Ajimov bolsa, balalardıń dóretiw­shiliktegi ayaq alısı, ásirese olardıń qosıq jazıwdaǵı tal­pınısı, qáte-kemshilikleri haq­qında toqtap, ózi­niń yumorǵa qurılǵan  qósıq­larınan oqıp berip, oqıwshı­lardıń júzlerinde kúlki oyattı. Gaze­tamızdıń inglis tili klubı jetekshisi B.Sultamuratov «Inglis tilin úyre­niwshilerge 7 másláhát» atamasında prezentaciya islep, oqıw­shılarǵa inglis tilin úyreniw boyınsha eń kerekli keńeslerin berdi. Oqıwshılardıń maqala jazıw sheberligin arttırıw maq­setinde gazetamızdıń arnawlı xabarshısı I.Xoja­muratova tárepinen ótke­rilgen interaktiv oyınǵa xabarshılar bel­sendilik penen qatnasıp, redak­ciyamızdıń sawǵaların alıw­ǵa miyasar boldı.

Balalardıń bayramı qar­sańında ótkerilgen bul ilajǵa 40 qa shamalas oqıwshılar qatnasıp, olar seminardan úlken tásirler alıp, olardıń dóre­tiwshilikke degen qızıǵıwshılıǵı artıp, olar jazǵı dem alısta da súyikli gaze­tasınan qol úz­bey, mudamı birge bolıwǵa baǵdarladı. Ási­rese, shoma­naylı ustaz Gúl­fiya Sadul­laeva­nıń basshılıǵında kelgen bir topar oqıwshılar seminarda belsendiligin kórsetti. Álbette, «Jetkinshek» gazetası tárepinen ótkerilip atırǵan bul ilajlardıń barlıǵı sizlerdiń aydın keleshegińiz jolında kórsetilip atırǵan úlken itibardıń bir úlgisi. Demek, bunday ǵamxorlıqlarǵa sizler de múnásip perzentler bolıp, tek ǵana jetiskenliklerińiz benen ata-analarıńızdı, ustazlarıńızdı quwanta beriwinizdı tileymiz.

Zuxra Isakova

arnawlı xabarshımız

Q.Begimovtıń túsirgen súwretleri